مش مهم قالوا ايه ومين اللي قال
المهم فوزنا والحلم علم عين المنال
كاس وخدنا .. و أرقام كسرنا
ومنتخبنا أصبح مثال
وكاسي حالالي .. أصبح بالالي
وزيك ياغالي .. علي التوالي
بالتلاتة أصبح محال
صحيح كان غاطس قلوبنا ييجي عشرة متر من دقايق
يدخل فينا جون يروح تعبنا ويبقى يومنا مش حظه رايق
لكن ربك ساتر .. جابر خواطر.. جابها زين .. أتاري جدو حظه فايق
ولما نط فط حط جون .. يا سلام .. قلوبنا طارت علو الجبال
ما تعرف بنين من بنات .. و الكل في فرحه زاط .. زي العيال
وفي ثواني رقصت حواري ويّا شوارع في حضن البيوت
تقولش كانت بتمد رجليها ويّا جدو وتقولوا يا عم شوط
يالله فرحة تغسل عيشة عكرة
و يا رب بكرة يبقى أحلى من اللي فات
و أقول يا سيدي يطلع بأيدي أعلي صوتي
و أدفن سكوتي عن الفساد ..أغير حكومة وبرلمانات
أخد حقوقي تعليم وصحة
سكن و شغل وعيشة برحة
مش حأغني ياحبيبتي يا مصر
و أنا ساكن في المقابر صابر و شاكر
ومن الفجر أفرش ده الرصيف ببضاعة
هايفة تداريني من بطالة تعليمها عالي
أو أنحشر في مواصلة زي القبر طاير
أو أفتح بلوزة ولا جيبة حسب المصاري
أو أقضيها شم و سم أو أجرج ف قهاوي
أو أبيع فص كبد أو نص كلاوي
لأجل أعيش
مش يبقى نص الواحد في الميه
وعلى تسعين في المية يكوش تكويش
وياريته بجهد وحق كنا شهدنا له بحق
إلا فساد و قباحة ، نصب مغموس برشاوي
مش دي اللي حبيبتي وقلبي ينقطها وغاوي
مصر بلد جدودي .. أنا مش مالاوي
حقي فيها و حق ولادي فيها يساوي
زي ماليكم .. زي مالي
صحيح ده يوم فرحة و غناوي
أنا مش ح أقلبها مناحة و لادرس فصاحة
حتى أختي وأبن أخوي قالوا لي أفرح ..
والله كنت على الفرح ناوي
بس قلبي غاوي بلاوي
تنوية و اجب : كان بودي أن أعبر عن فيض مشاعري باللغة التى أعشق .. لكن كانت لهجتي المحكية أسبق .. فطاوع عقلي و قلبي لساني فأوفى بالوعد ووثق .. فعذرا لمعشوقتي و عقلي و قلبي .. و شكرا للساني الذي صدق
و للحديث بقية إن كان
0 comments:
إرسال تعليق
أشكر لك تعليقك .. و أتمنى عليك أن تنقي بتعليقك شوائب أفكاري و أعتذر مقدما إن أسئت بكلماتي دون قصد الي أحد ... كلماتك شطر روحك فأنتخب منها ما يريحك ....هذا قولي ... و أجمل منه قول الأمام الشافعي " ما جادلت أحدا ، إلا تمنيت أن يُظهر الله الحق على لسانه دوني " الأمام الشافعي